عند بيت ام فاروق

كان في عهد الخلافة الإبراهيمية .. في عهد ابراهيم بك طيب الله ثراه ورحم الله أيامه ..

عند التحضير للزفاف عند الفلاحين يقومون بعمل شيء ما مثل الليلة .. تسمي ليلة الحنة عقبالكم كده

وكانت النساء يغنين اغنية جميلة ويقلن

عند بيت أم فاروق .. الشجرة طرحت برقوق

فاستغرب إبراهيم بك الله يرحمه من هذه المقولة

اشمعنى ام فاروق يعني

ما كان ممكن يقولوا عند بيت ام نبيل

او عند بيت ام احمد

خصوصا وان ام احمد ست طيبة جداااااااااااااااااااااااااااااااااااااااااااااااا

فتنكر الحاج ابراهيم بك ولبس ملابس فلاحي وذهب في الحارة اللي تسكن فيها أم فاروق ..

فسمع هذا الحوار بين اتنين ستات ( بالطريقة الشعبية جدا )

الاولى : العوافي يا ام عاشووووووووووووور

الثانية : الله يعافيكي يا ام خاااااااااااالد

الاولى : اخبارك ايه يا ختي محدش بيشوفك يعني .. انتي ايه بتتقلي علينا ليه

الثانية : لا والنبي يا ختي دا انا كنت عند ام تامر ..

ام تامر اشمعنى دي حتى الست دي بقالها كتير مش باشوفها

يا ختي بلا وكسة .. ابنها تامر على طول واكسها كده .. ووشها منه بقى في الأرض ..

ايوة يا ختي انا ملاحظة ان الواد تامر كل يوم والتاني صحته في النازل .. وكل يوم ازازة الميكركروم في ايده و دماغه .. ما تعرفيش يا ختي هو بيشتغل ايه ؟

بيشتغل ؟! يا ختي تامر ما بيشتغل .. ده وما ورهوش غير شغلانة واحدة بس

يا ختي شوقتيني .. بيشتغل ايه ؟

بيعاكس بنات الحارة اللي جنبينا وكل يوم والتاني .. واحدة ترقعه كعب جزمتها في نافوخه

ااااااااه عشان كده دماغه مفتوحة كل يوم والتاني

طيب يا ختي محدش يعقله الواد الاهبل ده .. ده حتى عنده اخت .. مش خايف عليها ..

يا ختي هو اللي زي ده يعمل حساب لاخت ولا لام ..

ده واد صايع ..

يا ختي ربنا يهديه .. قولي امين

وهو اللي زي ده ربنا هيهديه

ده ربنا هيهده

ياختي خليكي محضر خير ..

وبعد مروووووووووووووووووووووووووووووووور

شوية كمان

مرور شويتين كمان

اتقابلوا الاتنين الستات تاني

والحاج ابراهيم بك مراقب للموقف .. لانه عجبه الحكاية اوي

الاولى : شوفتي يا ختي اللي جرا للواد تامر ..

الثانية : ايه يا ختي اللي حصل ؟؟ اوي يكون الواد تامر عمل مصيبة تاني

لا يا حبيبتي ده فيه واحد اسمه فاروق اتعرف عليه

بس ولد ايه

وابراهيم بك مراقب للوضع

اه وصلنا لمين فاروق

المهم ماله فاروق يا حاجة

فاروق ده الواد بن ام فاروق ...

يا سلام ابن ام فاروق

اه يا ختي تصدقي

تصدقي اول مرة اعرف ان ام فاروق عندها ولد اسمه فاروق

اه يا ختي

ماله فاروق

فاروق ياختي اتعرف على تامر

ياختي اوعي يكون الواد تامر بوظه

لا بالعكس الواد فاروق ده واد متلزم

يعني ايه متلزم يا اختي

متلزم يعني وشه على طول عمره ما بيرفعه في واحد ست كبيرة ولا صغيرة

بجد ولد عنده حاجة ياختي بيقول عليها اسمه العفة

ايه .. عفة

اه يا ختي عنده عفة

يا حلاوة يا ولاد الواد فاروق عنده عفة

وايه اللي دخل العفة يا ختي في موضوع الواد تامر

اصل يا اختي الواد فاروق اخد الواد تامر معاه بعد ما راح ضمنه في القسم

ايه قسم ايه ... هي وصلت للقسم .. هي حصلت

اه يا اختي البت بت ام جرجيرة .. الواد تامر بيبصبص لها راحت رقعاه على وشه قلم ببوز الشبشب وراحت مصرخة ولمت عليه الناس

يا لهوووووووووووووووووووووووووووووووووووووووي الواد بيبببصبص لي

ياختي بلا نيلة ودي بت يتبصلها

اهي فراغة عين بعيد عنك

وابراهيم بك مراقب للوضع

وبعدين الشاويش عنتر جه و سحب الواد تامر من قفاه على القسم

واحتاج لواحد يضمنه

ها يا ختي وبعدين

طلع الواد فاروق من بيته وقال اكسب فيه ثواب .. وراح ضمنه وطلعه من القسم

ومن يومها الواد تامر مش بيسيب الواد فاروق خالص .. لغاية ما اتعلم منه يا اختي الادب

ياه ده الواد فاروق ده طلع جدع اهه ومؤدب .. ومتلزم

وهنا خرج ابراهيم بك وقالهم

اسمها ملتزم مش متلزم

قالوا : ايه ده ابراهيم بك في حيننا

فقالهم : انا سعيد جدا اني اعرف واحد زي فاروق ده .. انا لازم اكافئه ... فسأل على بيته

فقالولهك : هناك بيت فاروق بن ام فاروق عند شجرة البرقوق دي

فقالهم : بس انا عندي ليكم نصيحة .. بلاش تجيبوا في سيرة الناس يا ستات يا ولاد .........................

وهنا عرف ابراهيم بك لماذا يقولون في الزفة الفلاحي ..

عند بيت ام فاروق .. هاي هاي.. الشجرة طرحت برقوق .. هاي هاي

مش عارف يعني ايه هاي هاي دي

بس مش مشكلة

اللي عنده تفسير ليها يبقى يقول لي عشان ابراهيم بك طيب الله ثراه ينام وهو مستريح

_________________
[بنبض وعزم اصرارى حشيل الورد من الصبار واجيب من ضلمتى نهارى واشق البحر والاعصار ومهما يعاند التيار حشد لاخر المشوار وحمشى فى سكة الابرار وخلى الدنيا سامعانى حعيش واتحدى احزانى